РЕАКЦИЈА ДО ФОНДОТ ЗА ЗДРАВСТВЕНО ОСИГУРУВАЊЕ
Почитувани,
Изминатиов период голем број на наши членови се обратија до Националното здружение за помош и поддршка на лица со мултипла склероза – Национално здружение за МС – Скопје, со реакции дека одредени ортопедски помагала не се достапни за нив. Конкретно се работи за анатомски обликувани влошки за лесен и среден степен на инконтиненција и високоперформантни анатомски ноќни пелени за инконтиненција (уринарна и фецесна), кои пациентите не можат да ги подигнат од аптеките кои им ги издаваат, согласно количината која за секој пациент е одредена на месечно ниво и за која имаат валидна потврда издадена од Фондот.
Останувајќи доследни на нашата определба како Здружение, да работиме за подобрување на системот на здравствена заштита, со цел унапредување на квалитетот на животот на нашите членови и на пациентите со МС, воопшто, се обративме до Фонд за здравствено осигурување на Р.С. Македонија како надлежна институција, детално запознавајќи ги со настанатиот проблем.
Беше истакнато дека вакви помагала користат не само пациентите со МС, туку и пациенти со низа други хронични состојби кои предизвикуваат инконтиненција, што значи со проблемот се засегнати значителен број на осигуреници, за кои овие производи се нужни за секојдневното оптимално функционирање, како и фактот дека количините кои им се одобрени за набавка на товар на Фондот за нив се од суштинско важност за нив бидејќи претставуваат значително олеснување на личниот буџет, кој во секој случај, во голем дел се троши на производи поврзани со одржување на здравствената состојба.
Нагласувајќи дека се работи за пациенти за кои здравственииот систем утврдил дека имаат потреба од овие производи и имаат важечка потврда за користење и набавка на истите, издадена од Фондот за здравствено осигурување, побаравме да бидат превземени потребните чекори од Фондот за здравствено осигурување за да се утврди на што се должи недостигот на влошки и пелени за инконтиненција во аптеките кои се задолжени да ги издаваат овие помагала.
Ние како Национално здружение сме свесни за потребата од долгорочна одржливост на системот за достапност на лекови и помагала за пациентите со МС, па поради тоа апелираме доколку се работи за пропуст од административна природа, или проблем поврзан со логистички или други недоследности во набавката односно дистрибуцијата, итно да се превземат сите мерки за контрола и координација меѓу вклучените субјекти во овој ланец од поврзани постапки, се со цел проблемот да биде решен во најбрз можен рок.
Ја поздравуваме кооперативноста на советникот на Директорот на Фондот за здравствено осигурување за ортопедски помагала, Даниела Стојановска Џинговска која во одговор на нашиот допис не информираше дека на следниот состанок на Комисијата за ортопедски и други помагала детално ќе се разгледа проблемот, ќе се исконтактираат аптеките и добавувачите на помагалата со цел да се детектира причината за оваа состојба и да се најде ефикасно решение.
Националното Здружение за МС останува во постојана комуникација со Фондот за здравствено осигурување и со останатите институции и други чинители, сѐ до разрешување на овој проблем во полза на пациентите, за кое јавноста навремено и транспарентно ќе биде информирана.
Искрено Ви благодариме што ни укажувате на предизвиците со кои се соочувате како пациенти, и што го препознавате Националното Здружение за МС како репрезентативна и посветена организација за афирмација и заштита на Вашите права и за подобрување на Вашето здравје.
Ве охрабруваме и понатаму да нѐ информирате за сите слични ситуации, бидејќи тоа е клучно за навремено предлагање на вистински решенија до сите институции и организации во системот на здравствена и социјална заштита.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance) и асоцијативна членка на Алијансата на пациентски организации (АПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.