РЕАКЦИЈА ЗА ПОТРЕБАТА ОД ТРАЕН НАОД И МИСЛЕЊЕ ЗА ЛИЦАТА СО МС
Почитувани,
До Националното здружение за помош и поддршка на лица со мултипла склероза, во континуитет стигнуваат реакции за остварувањето правото на надоместок за попреченост и правото на надоместок за помош и нега од друго лице, односно за потребата од повторен преглед на секои 6, 12 или 24 месеци при обновување на документацијата која се доставува до Центрите за социјална работа.
Ова значи постојани специјалистички прегледи и закажување на Комисии, а не е за занемарување и надоместокот за издавање на Конзилијарно мислење од 1.250 денари кој е на товар на пациентот.
Имајќи предвид дека мултипла склероза е болест со прогресирачки тек и настанатите влошувања на состојбата се трајни, Националното здружение за МС се обрати со укажување до Министерството за труд и социјална политика, дека е нужно за овие корисници да се предвиди поедноставна постапка. Така, наместо Комисиите да издаваат Конзилијарни мислења од времен карактер со утврдување на потреба од повторен преглед, треба наодите и мислењата да бидат трајни, со што Центрите за социјална работа ќе имаат можност да донесуваат трајни решенија за користење на овие права.
За да се овозможи тоа треба е да се изменат на соодветните Правилници кои ја регулираат потребната документација за остварување на овие права како и постапувањето на Комисиите.
Веруваме дека ќе наидеме на разбирање од Министерството, кое ќе ги измени потребните Правилници во интерес на здравјето и довербата на пациентите. Остануваме посветени на активното застапивање на правата на пациентите со МС!
Со почит,
Вашиот МС Тим