По пет години, повторно е спроведена анкета за јавната свест за мултипла склероза
![](https://msmakedonija.eu.org/wp-content/uploads/2024/06/IMG-fb8e1b4cb92a2ceb188f1f04056019bc-V.jpg)
Националното здружение за помош и поддршка на лицата со мултипла склероза во соработка со двете медицински студентски асоцијации ЕМСА и ММСА, по повод Светскиот ден на мултипла склероза спроведоа анкета на случајни минувачи. Анкетата се спроведе наспроти Археолошкиот музеј, на плоштадот Македонија во Скопје на 30.05.2024 година. По повод Светскиот ден, Археолошкиот музеј во вечерните часови беше осветлен во портокалова боја.
Целта на анкетата беше да се испита свесноста на општата популација за Светскиот ден на МС и за мултипла склероза воопшто и воедно да се споредат резултатите со тие добиени во 2019 година.
За таа цел беше изготвен анкетен прашалник со 3 прашања на кои можни одговори беа ДА и НЕ. Односно:
- Дали знаете зошто зградата на Археолошкиот музеј вечерва е осветлена во портокалова боја?
- Дали знаете што е мултипла склероза?
- Дали постои можност да се излекува мултипла склероза?
Во анкетата вкупно учествуваат 61 случаен минувач од различна возраст и пол. Oбработените податоци го прикажуваат следново:
Само 5% од анкетираните знаат зошто Археолошкиот музеј е осветлен во портокалова боја, во споредба со 2019 година, каде 16% одговориле со ДА. Се забележува дека сѐ уште мал број на луѓе го знаат симболичното значење на портокаловата боја.
62% од анкетираните знаат што е мултипла склероза, во споредба со 2019 година, каде 44% одговориле со ДА. Сее забележува дека сѐ поголем број на луѓе се запознаени со мултипла склероза.
52% од анкетираните веруваат дека постои лек за мултипла склероза, во споредба со 2019 година, каде 40% одговориле со ДА. Евидентно е дека поголем дел од луѓето иако знаат за мултипла склероза, сѐ уште не се доволно информирани во однос на можностите за третман.
Сето ова ни дава за право да кажеме дека сме на добар пат, дека ја подигнуваме јавната свест за МС но и обврска да продолжиме со нашите активности со цел решавање на проблемите со кои се соочуваат лицата со мултипла склероза.
Прочитајте за мултипла склероза тука.
За Националното здружение за МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 11. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance), асоцијативна членка на Интернационалната МС федерација (анг. MS International Federation) и полноправна членка на Националната Алијанса на пациентски организации (НАПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
Повеќе за здружението на следниов линк.