ПРАВО НА ОСЛОБОДУВАЊЕ ОД ПЛАЌАЊЕ НА ПАРТИЦИПАЦИЈА ПРИ КОРИСТЕЊЕ НА ЗДРАВСТВЕНИ УСЛУГИ ЗА ЛИЦАТА СО МУЛТИПЛА СКЛЕРОЗА

МС Македонија
јануари 21, 2025

Почитувани,

Во изминатиов период до Национално здружение за МС пристигнаа прашања во врска со правото и постапката за ослободување од плаќање на партиципација при користење на здравствени услуги за лицата со мултипла склероза. Во насока на појаснување на определени дилеми кои се појавуваат при остварувањето на ова право, Ви укажуваме на следното:

Согласно член 1 од Законот за изменување на законот за здравственото осигурување („Службен весник на РСМ” број 154/2023) осигурените лица со попреченост корисници на права од социјална заштита и детска заштита се ослободени од плаќање на учество при користењето на здравствените услуги.
Според практиката и досегашните ставови на Фондот за здравствено осигурување здравствени услуги за кои важи ослободување од плаќање на здравствена партиципација согласно овој Закон, се:

  • Специјалистичко – консултативна здравствена заштита
  • Болничка здравствена заштита
  • Лекови издадени на рецепт на товар на ФЗОРСМ.

Во специјалистичко – консултативната здравствена заштита спаѓаат:

  1. испитување и утврдување на заболувањата, повредите и здравствената состојба;
  2. cпроведување на специјализирани дијагностички, терапевтски и рехабилитациони постапки;
  3. протези, ортопедски и други помагала, помошни и санитетски справи и материјали и забнотехнички средства според индикации утврдени со општ акт на Фондот на кој министерот за здравство дава согласност и
  4. функционална проценка на деца и младинци со попреченост до 26 години.

Во болничката (краткотрајна и долготрајна) здравствена заштита спаѓаат:

  1. испитување и утврдување на здравствената состојба, лекување, рехабилитација, нега, сместување и исхрана во болнички услови;
  2. лекови според листата на лекови што со општ акт ја утврдува Фондот на кој министерот за здравство дава согласност, како и помошни материјали кои служат за примена на лековите и санитетските и друг материјал потребен за лекување и
  3. сместување и исхрана на придружник при неопходно придружување на дете до тригодишна возраст, додека е на болничко лекување, но најмногу до 30 дена и
  4. ласерска корекција на диоптер според услови и критериуми утврдени со општ акт на Фондот, на кој министерот за здравство дава согласност.

Меѓутоа за да се осварува ова право Фондот за здравствено осигурување на РСМ треба да овозможи овие лица да бидат евидентирани и податоците кои се однесуваат на основите за ослободување од плаќање на учество- партиципација да бидат интегрирани во електронскиот систем на Фондот.

Бидејќи тоа се уште не е направено, според сознанијата на тимот на Национално здружение за МС- Скопје, како преодно решение ФЗО ги известил сите здравствени установи за ослободувањето од партиципација за лицата со попреченост, додека Министерството за социјална политика, демографија и млaди ги известило сите Јавни установи (меѓуопштински Центри за социјални работи) дека имаат обврска да издаваат потврди на лицата со која потврдуваат дека се корисници на правата од законот за социјална заштита, што е предуслов за ослободувањето (копија од потврдата се приложува во здравствената установа каде е дадена услугата). Оваа практика би требало да се користи се додека не се заврши прилагодувањето на електронскиот систем на ФЗО што ќе може да се разменуваат податоци по електронски пат и нема да има потреба од хартиените потврди.

Во иста насока на ослободување од плаќање на партиципација, се и Правилникот за утврдување на обемот на здравствените услуги што паѓаат на товар на средствата на Фондот за здравствено осигурување, како и Годишната програма за партиципација при користењето на здравствена заштита на одделни заболувања на граѓаните и здравствена заштита на родилките и доенчињата, кои предвидуваат ослободување од плаќање учество на осигурениците/осигурените лица со мултипла склероза како корисници на здравствени услуги.

Ве охрабруваме за сите поединечни случаи во кои што сметате дека сте оневозможени во остварувањето на ова, или кое било друго право, да се обратите до Националното здружение за помош и поддршка на лица со мултипла склероза- Скопје на следниот е-mail: pravnapomos@msmakedonija.eu.org, а нашиот тим ќе Ви обезбеди соодветна правна помош поддршка. Со актуелизирање на конкретните недоследности во примената на правните прописи, освен тоа што добивате можност за решавање на Вашиот проблем, исто така, придонесувате и за создавање на услови за поквалитетно застапување на Националното здружение, во процесот на изнаоѓање и предлагање на конкретни решенија до надлежните институции.

Со почит,

Национално здружение за МС