Настан: „Кога телото си игра против тебе: Разоткривање на мултипла склероза“
На 3 ноември 2025 година, во амфитеатарот на Институтот за судска медицина, Скопје, при Медицински Факултет Скопје, се одржa едукативниот настан насловен „Кога телото си игра против тебе: Разоткривање на мултипла склероза“. Настанот, во организација на Националното здружение за МС во соработка со Македонската Медицинска Студентска Асоцијација (ММСА), се одржа со цел да се подигне свеста и интересот на идните доктори за оваа болест и приближување до искуствата што ги преживуваат пациентите со мултипла склероза (МС).
Овој едукативен интерактивен настан понуди јасни, научно засновани информации за МС, и отвори простор за разговор за првите симптоми, раната дијагноза и животот со ова хронично заболување. Ова е особено значајно за студентите по медицина, младите здравствени професионалци и сите кои сакаат подобро да ја разберат оваа комплексна состојба.
Предавачи и содржина
На настанот се обратија:
Науч. сор. д-р Слободанка Саздова Бурнеска од ЈЗУ Универзитетска клиника за неврологија, Скопје која низ прекрасна презентација ја претстави оваа сериозна, хронична состојба на присутните. Говореше за медицинскиот аспект на болеста, механизмите на автоимуниот напад и современите дијагностички пристапи.
Ана Карајанова Димитрушева, Биљана Велиновска и Александар Маринковски од Национално здружение за МС, Скопје ја пренесоа перспективата на пациентите, зборуваа за социјалните и психолошките предизвици и за потребата од пристапни услуги и поддршка.
Стефани Дојчиновска, од Медицински факултет, Скопје, прикажа студија на случај.
Модератор на настанот беше Стефан Николовски, студент на Медицинскиот факултет, кој го водеше разговорот и сесијата за прашања и одговори.
Зошто се важни овие едукативни настани?
- Зајакнува свесност за МС како комплексно невролошко заболување;
- Ги поврзува студентите со клиничката пракса и искуството на пациентите;
- Поттикнува разбирање, емпатија и рано препознавање на симптомите;
- Отвора дијалог за пристапност, поддршка и квалитет на животот на лицата со МС
Соединувањето на науката, пациентското искуство и емпатијата е клуч кон подобра грижа за лицата со мултипла склероза.
За Националното здружение за МС
Национално здружение за помош и поддршка на лица со мултипла склероза – Здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 11. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance), полноправна членка на Национална Алијанса на пациентски организации (НАПО) и асоцијативна членка на Интернационална федерација за мултипла склероза (анг. MSIF, Multiple Sclerosis International Federation).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
За да дознаете повеќе за здружението посетете ја веб страницата.