Учество на Националното здружение за МС на 8. Конгрес на Македонското невролошко друштво
Почитувани,
Од 9 до 12 октомври 2025 година, во Охрид се одржа 8. Конгрес на Македонското невролошко здружение, под наслов „Од теорија до терапија“, кој ги обедини водечките невролози од Македонија и регионот.
Националното здружение за мултипла склероза учествуваше на Конгресот со презентација на 2 абстракти (e-постери), засновани на истражувања насочени кон пациентите и застапување за подобра и поквалитетна грижа.
🔹 Постер 1: „Пациентски искуства во поддршка на децентрализиран пристап до терапија во Македонија“
Ова истражување, каде околу 100 испитаници споделија одговори, дава јасни докази дека актуелниот централизиран модел за третман на мултипла склероза создава значителни логистички, физички и финансиски оптоварувања за пациентите и нивните негуватели. Многумина се потпираат на поддршка од други лица за патување, губат драгоцено време и се соочуваат со финансиски трошоци.
Заклучок од истражувањето е дека децентрализираниот пристап до терапијата претставува значајна можност за подобрување на исходите и квалитетот на живот на пациентите.
Овозможувањето на пристап до терапијата преку здравствени установи близу до домот на пациентот не само што би ги намалило овие оптоварувања, туку и би го усогласило здравствениот систем со реалните потреби на лицата со мултипла склероза.
🔹 Постер 2: „Искуство при дијагностицирање на мултипла склероза во Македонија“
Ова истражување укажува на значителни одложувања и празнини во процесот на дијагностицирање и лекување на мултипла склероза во Северна Македонија.
Заклучокот е дека подобрувањето на системот за упатување, раната детекција на симптомите и проширувањето на пристапот до навремено лекување се клучни за подобрување на исходите кај лицата со мултипла склероза.
Преку овие презентации, здружението ја потврди својата посветеност на застапување засновано на докази, соработка меѓу стручната заедница и пациентите, и унапредување на квалитетот на живот на лицата со МС и нивните семејства.
Учеството на Националното здружение за МС на овој престижен настан уште еднаш ја зацврсти неговата улога како мост меѓу заедницата на пациенти, здравствените професионалци и јавните институции – кои заедно работат на тоа знаењето да се претвори во практична поддршка.
Што е мултипла склероза?
Мултипла склероза (МС) е една од најчестите невролошки нарушувања и причини за инвалидитет кај младите возрасни лица. Тоа е хронична, прогресивна, имунолошки посредувана, воспалителна и дегенеративна болест на централниот нервен систем. Настанува кога имуниот систем ја напаѓа обвивката на нервните клетки (миелин) во мозокот, ’рбетниот мозок и оптичките нерви, предизвикувајќи воспаление и последователна дегенерација, што води до прекин на невротрансмисијата на сигналот од една нервна клетка до друга.
Во Македонија од МС боледуваат повеќе од 2200 лица додека во светот има повеќе од 2,8 милиони лица. Многу е веројатно дека стотици илјади лица остануваат недијагностицирани и многу животи се индиректно зафатени. Повеќето лица со МС се дијагностицираат на возраст од 20 до 40 години, и околу два-три пати почесто се дијагностицираат жени наспроти мажи.
Причината за МС сѐ уште не е позната и до сега не постои лек, но постојат лекови кои можат да им помогнат на лицата со МС да ја стават болеста под контрола и постојат многу опции за подобрување и управување со симптомите.
МС го прави животот непредвидлив за секого. За да дознаете повеќе за МС посетете ја веб страницата.
За Националното здружение за МС
Национално здружение за помош и поддршка на лица со мултипла склероза – Здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 11. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance), полноправна членка на Национална Алијанса на пациентски организации (НАПО) и асоцијативна членка на Интернационална федерација за мултипла склероза (анг. MSIF, Multiple Sclerosis International Federation).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
За да дознаете повеќе за здружението посетете ја веб страницата.