Барање до ФЗОРСМ за промена на концептот за третман на пациентите со мултипла склероза
Почитувани членови,
Водени од нашата стратешка цел – придонес кон достоинствен и квалитетен живот на лицата со мултипла склероза, Националното здружение за помош и поддршка на лицата со МС како препознаен и кредибилен застапник на правата на лицата со МС, во континуитет укажува на барањата на пациентите пред надлежните институции и се труди да понуди решенија кои ќе бидат во полза на сите.
Во таа насока, ве информираме дека се обративме до Фондот за здравствено осигурување на РСМ со укажување на проблемите со кои се соочуваат пациентите со МС. Пред се како суштинска беше издвоена потребата од зголемување на буџетот за набавка на соодветна терапија, со оглед на сè големиот број на лица кои не примаат никаква терапија, или примаат недоволно ефикасна терапија која би им овозможувала поголема функционалност при секојдневните активности.
Освен ова, беше укажано и на потреба од воведување на нов модел на дисперзирање на третманот на лицата со мултипла склероза низ другите здравствени установи кои ги исполнуваат потребните услови (тековно се вклучени во имплементација на клинички студии за третман на МС) со цел полесна достапност до здравствена грижа за пациентите, низ главниот град и внатрешноста.
Придобивките од ваквите практики би биле повеќекратни. Освен избегнување нa непотребно изложување на трошоци и ризик при патување за пациентите, значително би се намалил притисокот врз Универзитетската клиника за неврологија која сега е единствената здравствена институција каде се издава и прима терапијата за МС, а особено значаен на долг рок, е и трансферот на знаење за третман на мултипла склероза кон здравствените установи во другите градови и зголемување на нивната понуда на здравствени услуги.
Националното здружение за МС останува посветено кон наоѓање одржливо решение за достапност на ефикасна терапија за сите пациенти со мултипла склероза и ќе ве информира за сите следни чекори.
Со почит,
Национално здружение за МС