Два месеци успешно спроведување на проектот за психолошка и психотерапевтска помош и поддршка
Скопје, 02. ноември 2020 г.
Националното здружение за помош и поддршка на лица со мултипла склероза информира дека веќе 2 месеци успешно се спроведува проектот насловен „Психолошка и психотерапевтска помош и поддршка за лицата со МС“.
Горди сме што можеме да кажеме дека иницирањето на проект од ваков вид веќе втор месец бележи успех, што претставува релевантен доказ за остварување на нашата мисија и визија. Имено, за ова говори и зголемениот број лица кои се корисници на овој вид помош и поддршка, така што во текот на месец октомври одржани се 31 сесија, додека веќе следниот месец во најава е уште поголем број на закажани индивидуални сеанси.
Пријатно сме изненадени од убавите зборови пристигнати на официјалниот е-меил на здружението, упатени од дел од корисниците. Ви пренесуваме дел од нив:
„Големо благодарам. Одличен избор на психолог, мене многу ми помогна. Поздрав и само напред.“ – Јовчевска Благица.
„Во ова време на пандемија, покрај тоа што се соочуваме со нашиот предизвик МС, дополнителна борба водиме и со новонастанатата состојба кој предизвикува страв, анксиозност и притисок. Благодарение на оваа можност обезбедена од Националното здружение за МС, јас се чувствувам подобро. Топло ја препорачувам Наташа Митровска-психолог. Затоа, ги охрабрувам сите кои се двоумат, да пробаат да си помогнат.“ – С. П.
Да потсетиме дека корисниците оваа услуга ја добиваат бесплатно, бидејќи сите трошоци за спроведување на истата се на товар на Националното здружение за МС.
Ги охрабруваме лицата со мултипла склероза, членови на Националното здружение за МС, да ја користат оваа услуга, бидејќи покрај товарот од справување со хронична болест се соочуваме и со стресната состојба предизвикана од COVID-19, кое би можело негативно да влијае на нашата здравствената состојба. Подетални информации за овој вид услуга ви се достапни на следниот линк.
Ова претставува доказ дека Националното здружение за МС прераснува во квалитетен сервис чии активности се фокусираат токму во задоволување на потребите и интересите на лицата со мултипла склероза и членовите на нивните семејства.