Вртоглавица и зашеметеност кај мултипла склероза

Мултипла склероза (МС) е болест на имунолошкиот систем која го зафаќа централниот нервен систем. Воспалителните процеси карактеристични за МС го оштетуваат миелинот, заштитната обвивка околу нервните клетки. Како резултат на ова се создаваат лезии или задебелувања на ткивото, кои го попречуваат преносот на нервните сигнали.

Симптомите на МС може да вклучуваат тешкотии со видот, вкочанетост на екстремитетите и тешкотии со рамнотежата. Вртоглавицата и зашеметеноста се вообичаени симптоми на МС, иако кај повеќето лица со МС не се појавуваат како први симптоми. За да дознаете повеќе за овие симптоми и што да преземете во врска со нив прочитајте во продолжение.

Вртоглавица и зашеметеност кај МС

Многу од лицата со МС доживуваат епизоди на зашеметеност, што создава чувство на неурамнотеженост и слабост. Други пак доживуваат епизоди на вртоглавица (вертиго). Вртоглавица е лажно чувство на вртење на телото или тлото на кое стоите. Според едно истражување околу 20% од лицата со МС доживуваат вртоглавица.

Вртоглавицата и зашеметеноста придонесуваат за тешкотии со рамнотежата, кои се чести кај лицата со МС. Овие симптоми може да создадат тешкотии во извршувањето на секојдневните задачи, да го зголемат ризикот од паѓање, па дури и да создадат попреченост.

Какво е чувството на вртоглавица

Вртоглавица е интензивно чувство на вртење дури и ако не се движите. Ова е слично чувство на она кое се создава кога се вртите на вртелешка во забавниот парк. Кога за прв пат ќе почувствувате вртоглавица може да биде многу вознемирувачки, дури и застрашувачки.

Вртоглавицата може да биде придружена со гадење и повраќање. Може да трае со часови, па дури и денови. Понекогаш вртоглавицата и зашеметеноста се придружени со тешкотии со видот, тинитус или губење на слухот, или тешкотии со движењето.

Причини за вртоглавица и зашеметеност кај МС

Лезиите во мозокот кои се создаваат како последица од МС го отежнуваат процесот на пренесување сигнали од централниот нервен систем до целиот организам. Ова предизвикува симптоми на МС кои варираат во зависност од локацијата на лезиите. Лезиите во мозочното стебло или малиот мозок, делот на мозокот кој ја контролира рамнотежата, може да предизвикаат вртоглавица.

Вртоглавицата, исто така може да биде симптом на проблем со внатрешното уво. Други можни причини за вртоглавица или зашеметеност вклучуваат одредени лекови, болести на крвните садови, мигрена или мозочен удар. Вашиот лекар може да  помогне да ги утврдите причините за вртоглавица.

Како да си помогнете (мерки за самопомош)?

Кога ќе се појави вртоглавица, следниве чекори можат да ви помогнат да останете безбедни и да се чувствувате поудобно:

• Седнете додека вртоглавицата не помине.
• Избегнувајте поместување на положбата на главата или телото.
• Исклучете ги силните светла и не обидувајте се да читате.
• Избегнувајте скали и не обидувајте се да возите додека не бидете сигурни дека вртоглавицата поминала.
• Кога ќе се чувствувате подобро почнете да се движите многу бавно.

Ако се појави вртоглавица во текот на ноќта седнете исправено, вклучете слабо осветлување и останете мирни додека не се чувствувате подобро. Вртоглавица може да се повтори кога ќе го исклучите светлото и ќе легнете. Може да ви помогне удобна лежечка столица.

Третман за вртоглавица и зашеметеност

Можеби сѐ што ви е потребно е некои од лекарствата кои помагаат за симптомите на гадење при патување. Тие се достапни како орални таблети или како лепенки за кожа. Ако вртоглавицата или зашеметеноста станат хронични (долготрајни) вашиот лекар може да ви препише помоќни лекови против болест при движење или лекови против гадење.

Во случаи на тешка вртоглавица вашиот лекар може да предложи краткотрајна терапија со кортикостероиди. Исто така, физикалната терапија може да биде корисна за подобрување на рамнотежата и координацијата.

Ризици од вртоглавица и зашеметеност

Тешкотиите со рамнотежата предизвикани од вртоглавица и зашеметеност го зголемуваат ризикот од повреда поради пад. Ова е случај посебно кај лицата чии симптоми на МС веќе вклучуваат тешкотии при одење, слабост и замор. Неколку безбедносни мерки во домот може да помогнат во намалувањето на овој ризик:

• Отстранете ги опасностите од сопнување во вашиот дом, особено подните прекривки
• Користете бастун или одалка
• Вградете огради и рачки за придржување
• Користете стол во бањата

Она што е најважно, не заборавате да седнете веднаш штом ќе почувствувате вртоглавица или зашеметеност.

Разговарајте со вашиот лекар

Ако живеете со МС и имате чести напади на вртоглавица или зашеметеност разговарајте со вашиот лекар. Тој може да препорача испитувања за да се утврди дали МС е причинителот за овие тешкотии, како и да се отфрлат некои други можни причинители. Без оглед на причинителите, вашиот лекар може да препорача терапија за да се чувствувате подобро.

 

Извор:  https://www.healthline.com/health/multiple-sclerosis/dizziness-vertigo

Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте  ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.