Управување со телесната тежина кај лица со мултипла склероза

Мултипла склероза (МС) е состојба во која имунолошкиот систем го напаѓа централниот нервен систем. Ова предизвикува оштетување назаштитната обвивка околу нервите и може да доведе до низа симптоми.

Кај повеќето лица со МС симптомите се влошуваат за време на воспаление, но потоа се подобруваат. Во некои случаи, симптомите на вкочанетост и пецкање, заматен вид, вртоглавица и болка се влошуваат со текот на времето.

Исто така, вообичаено за лицата со МС е зголемување на телесната тежина поради нивните симптоми. Важно е да се обидете да постигнете умерена телесна тежина и да ја одржувате. Прекумерната или недоволната телесна тежина може да ги влоши симптомите на МС.

Зошто МС предизвикува флуктуација на телесната тежина?

МС предизвикува замор поради што се чувствувате премногу исцрпени за физичка активност. Болката и вртоглавицата можат да влијаат и на нивото на енергија кога станува збор за вежбање.

Симптомите на депресија се исто така вообичаени за лицата со МС. Депресијата може да предизвика прејадување или недоволно јадење, што може негативно да влијае на здравјето.

Третманите за МС, исто така, може да предизвикаат флуктуации на телесната тежина. Терапијата со стероиди често се препишува, и може да предизвика зголемување на телесната тежина.

Вежбањето може да помогне и за намалување и за зголемување на телесната тежина

Вежбањето е корисно за лицата со МС, без разлика дали сакаат да ослабат или да се здебелат. Иако зголемувањето на телесната тежина е почеста кај МС, губењето на тежината и губењето на мускулната маса може да се појават во напредни и сериозни случаи.

Лицата кои доживуваат губење на мускулната маса обично имаат симптоми кои се доволно сериозни за да ја ограничат подвижноста. Вежбањето и балансирана исхрана може да помогнат да избегнете губење на мускулната маса.

Заморот и останатите симптоми на МС, како што се промените на телесната температура, може да го отежнат редовното вежбање. Но, постојат одредени активности кои можат да бидат корисни кога се справувате со одредени симптоми.

На пример, пливањето може да биде корисно и не врши притисок врз зглобовите. Активностите во вода, исто така може да помогнат со симптомите ако температурата на вашето тело се зголеми додека вежбате. Можете, исто така, да носите елек или шал за ладење, кога имате активности на отворено, како што е планинарењето.

Запомнете, вежбите не мора да бидат физички напорни. Кратка прошетка секој ден може да направи голема разлика. Исто така, можете да практикувате вежби со мал напор, како што се стационарно возење велосипед, таи чи и јога.

Јога вежбите, кои може да ги изведувате во темпо кое вам ви одговара, се корисни за։

• ублажување на одредени симптоми
• подобрување на мускулната сила
• намалување на нивото на стрес
• намалување на заморот, што може да ве мотивира да вежбате уште повеќе

Разговарајте со вашиот лекар пред да започнете со понапорен режим на вежбање.

Размислете за вежбање со тренер кој има искуство во работа со лица со МС. Тој може да помогне да се развие програма за вежбање која одговара на вашата целокупна здравствена состојба.

Придобивки од вежбањето за лицата со МС

• намалување на телесната тежина
• зајакнување на мускулите
• подобрување на подвижноста
• зголемување на нивото на енергија
• намалување на сериозноста на симптомите на МС
• подобрување на расположението
• зајакнување на имунолошкиот систем

Додека градите рутина за вежбање, овие навики исто така ќе му помогнат на вашето тело да се опушти. Според „Harvard Health Publications“, вежбањето исто така може да помогне во намалување на стресот и подобрување на расположението. Исто така, го стимулира мозокот да создава природни лекови против болки, или ендорфини.

Како да се храните за да ја намалите телесната тежина

Често, јадењето оброци богати со хранливи материи оди рака под рака со вежбање за намалување на тежината. Но, важно е да не ги сметате вашите навики во исхраната за „диети“, особено кога не постои специфичен план за исхрана за лицата со МС.

Повеќето специјалисти препорачуваат лицата со МС да следат општа диета со малку маснотии и богата со влакна. Одржувањето мал и одржлив калориски дефицит може да ви помогне постепено и безбедно да го изгубите вишокот килограми.

Некои истражувања сугерираат дека одредени диети, вклучувајќи кетогенска, палео диета и практикување на пост, може да  подобрат некои од симптомите на МС.

Предупредување за специјалните диети

Постојат многу видови на специјални диети, а некои конкретно ги таргетираат лицата со МС. Повеќето од овие диети немаат или имаат малку докази за нивните придобивки, иако се потребни повеќе истражувања. Многу од нив не се тестирани за ефикасност или безбедност.

Важно е да разговарате со вашиот лекар ако сте заинтересирани да испробате некоја специфична диета. Тој може да ви помогне да ја одберете најдобрата шема на исхрана за вашите индивидуални потреби.

Во принцип, губење на телесната тежината се случува кога согорувате повеќе калории отколку што консумирате. Колку калории ви се потребни зависи од голем број фактори, вклучувајќи ги и следниве:

• пол
• актуелна телесна тежина
• степен на активност

Овие бројки се разликуваат од личност до личност и вашиот здравствен тим може да ви помогне во создавањето на план.

Придржувањето до добро балансиран план за оброци и одржување  контрола на порциите може да ви помогне да ги постигнете вашите цели за слабеење. Посетете ја страницата на американското Министерство за земјоделство, „Choose My Plate “ за да дознаете повеќе за контролата на порциите и на кои видови храна треба да се даде приоритет.

Квалитетот на храната исто така е важен. Обидете се да се придржувате до изборот на необработени продукти како што се։

• свежо овошје и зеленчук
• цели зрна
• посни протеини
• маслиново и рибино масло

Постојат некои докази дека омега-3 и омега-6 масните киселини нудат придобивки за лицата со МС. Прегледот на студии од 2019 година, сугерира дека додатоците на омега-3 и рибините масла нудат придобивки за намалување на стапките на релапс, воспалителни маркери и квалитетот на животот за лицата со МС.

Биотинот, витаминот Б, исто така може да помогне при прогресија на попреченоста. Според една студија од 2016 година, високите дози на биотин предизвикале одржлив пресврт на попреченоста поврзана со МС.

Друго истражување покажува дека лицата со МС имаат поголема веројатност за недостаток на неколку хранливи материи, вклучувајќи витамин Д, витамин А и Б12.

Лицата со МС можеби ќе треба да ги надополнуваат овие хранливи материи за да одржат здрави нивоа. Зголемувањето на диететскиот внес на фолати, магнезиум и железо, исто така, може да биде корисно за лицата со МС.

Треба да се спроведат повеќе истражувања, но можеби вреди да се консултирате со вашиот лекар или нутриционист за совет.

Како да се храните ако сакате да ја зголемите телесната тежина

Вежбањето е сè уште важно, особено ако се обидувате да се здебелите. Освен што ги зајакнува мускулите, вежбањето може да го стимулира и вашиот апетит.

Недостатокот на телесна тежина, исто така, може да биде знак за недостатоци во исхраната. Ако со тек на времето ја губите телесната тежина, разговарајте со вашиот лекар. Можеби ќе треба да ги промените лековите или да пробате друг тип на третман. Регистриран нутриционист, исто така, може да ви помогне да креирате диета која ќе ви помогне да ја зголемите телесната тежина.

Планирањето на оброците и готвењето поголеми количини за да имате храна што лесно се загрева, исто така може да помогне, особено кога не сакате да готвите. Исто така, може да ви помогне да избегнете прескокнување оброци.

Други опции за третман

Одржувањето на вашето физичко и ментално здравје, и одржувањето на ниско ниво на стрес може да помогне да ја одржите телесната тежина во опсег кој најмногу ви користи. Други опции за третман кои можат да помогнат вклучуваат:

• мускулни релаксанти
• физикална терапија
• вежби за управување со стрес
• редовен одмор

Повеќето лица со МС можно е да се справат со губење или зголемување на телесната тежина. Вежбањето може да помогне во двата случаи, како и за ублажување на симптомите на МС.

Некои физички активности, како што се пливање и јога, исто така, може да бидат корисни ако често доживувате симптоми.

Консултирајте се со вашиот лекар ако имате тешкотии да управувате со вашата телесна тежина, барате совет за исхрана  или одржување на активноста.

 

Извор:  https://www.healthline.com/health/multiple-sclerosis/weight-management

Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.