Зошто МС може да предизвика сексуална дисфункција кај жените и што може да направите во врска со тоа
Сексуалноста е важен дел од животот и кога работите не одат добро во оваа област, има влијание на квалитетот на животот.
Сексуалната дисфункција понекогаш може да има дури и поголемо влијание врз општата ментална благосостојба, отколку сериозноста на некоја попреченост но, сепак, на оваа тема лицата со МС ретко разговараат со медицинско лице.
Едно истражување покажува дека „сексуалната дисфункција (СД) е непријатен но и недоволно пријавуван и недоволно дијагностициран симптом на нарушувањето”.
Што предизвикува сексуална дисфункција кај лица со МС?
Причините за сексуална дисфункција кај жени со МС се поделени во три описни групи:
Примарна сексуална дисфункција
Оргазмичка дисфункција, одложен или непријатен оргазам, како и намалена надразливост на гениталиите, намалено подмачкување и намалено либидо се некои од симптомите кои се припишуваат на лезии во делови на мозокот и ‘рбетниот мозок кои ги контролираат овие функции.
Секундарна сексуална дисфункција
Во некои случаи, на сексуалноста може да влијаат и причини кои што не се директно поврзани со лезии. Тука спаѓаат проблеми како болка, замор, проблеми со контролата на мочниот меур и дебелото црево.
Терцијарна сексуална дисфункција
Во оваа група спаѓаат социјални и лични причини за сексуална дисфункција како што се намалена самодоверба, нарушувања на расположението (како на пример депресија) и проблеми во врската.
Интересно, некои симптоми можат директно да се поврзат со лезии кај МС додека пак некои симптоми се повеќе универзални, но сепак се појавуваат.
Пет начини како да го подобрите сексуалниот живот
Истражувањето на третманите директно поврзани со МС, како и симптомите кои се вообичаени кај општата популација може да бидат од големо значење за подобрување на квалитетот на животот, бидејќи се поврзани со интимност и секс.
Зборувај за проблемот
Врските и физичката интимност се многу важни за општата благосостојба како и за чувството на задоволство.
Изнесувањето на проблемот и разговорот за него со медицинско лице може да претставува голем проблем но, сознанието дека за ваквата состојба постојат медицински причини и на располагање имаме ефективна нега, може да ја поедностави комуникацијата.
Сите медицински лица треба да ја разберат улогата што ја игра благосостојбата во целокупното здравје, а ние знаеме дека сексуалната интимност влијае на општата здравствена состојба кај голем број луѓе.
Отворање на темата и започнување на разговор не е толку едноставно, а општиот лекар (медицинското лице од примарната здравствена заштита) не секогаш ги има вистинските одговори и не секогаш ги има на располагање сите ресурси.
Научете како функционира вашето тело
Едукацијата може да биде многу моќно оружје. Разбирањето на природата на оргазмот, како и улогата на клиторисот, може да ви помогне да откриете што е тоа што вам би ви поттикнало чувство на задоволство.
Самозадоволувањето еден од начините да откриете што ви поттикнува задоволство. Дали нежен допир или употреба на вибратор е најдобро за вас?
Ваквиот начин на истражување може да послужи за двојна цел, да ви овозможи задоволство, како и да откриете во што уживате.
Ако се чувствувате комотно, вашите откритија можете да ги споделите со партнерот.
Побарајте помош за проблемите со мочниот меур
Лицата со МС неретко избегнуваат интимен однос со партнерот заради стравот од неконтролирано уринирање за време на сексуалниот чин. Во некои случаи ова може да биде причина да се побара стручна помош во врска со контролата на мочниот меур.
Уролог може да препише терапија или третман за хиперактивен мочен меур. Во случај да користите катетер испразнете го мочниот меур непосредно пред сексуалниот однос како би се избегнало неконтролирано протекување.
Може да биде корисно и зајакнувањето на мускулите во долниот дел на карлицата. Разговор со партнерот секако би помогнал затоа што тој можеби и не е загрижен колку што сте вие и не му претставува проблем. Можеби пешкир под вас е се што ви е неопходно двајцата да се чувствувате комотно.
6 вежби за проблеми со мочниот меур кај лица со МС, инспирирани од физикална терапија
Бидете подготвени со знаење, план…..и перници
Планирањето однапред можеби изгледа како да ја одзема целата забава во спонтаноста но, планирањето на “интимен состанок” всушност може да ја зголеми сексуалната желба.
Ако се чувствувате уморни навечер и тоа е проблем, обидете се да го договорите времето за секс наутро или попладне. Ако сепак состанокот го договорите навечер, потрудете се да обрнете повеќе внимание на себе во текот на денот. За да заштедите енергија можете да се релаксирате во топла бања или пак да искористите време за дремка во попладневните часови.
Ако имате проблем со недоволна влажност на вагината, експериментирајте со различни лубриканти како би го нашле тој што вам најмногу ви одговара. Лубрикантите не се подеднакво соодветни за секого, така што ако еден тип не ви одговара, не откажувајте се. Истражувајте што сè е достапно и откако ќе најдете што вам ви одговара чувајте го при рака за вечерните состаноци.
Ако имате болки во грбот или карлицата обидете се да подметнете перница под колената, или зад грбот. Можеби подобро ќе се снајдете во повеќе исправена положба.
Размислете за физикална терапија на долниот дел од карлицата
Физикална терапија на карлицата е високо ефективен третман за сексуална дисфункција.
Терапијата вклучува вежби за долниот дел на карлицата (вклучувајќи ги и Кегеловите вежби), моторни вежби (вклучува и вежби за опуштање на мускулите во долниот дел на карлицата) и други модалитети како што е електрична стимулација.
Едно истражување објавено во “Multiple Sclerosis Journal” потврдува дека физикалната терапија на карлицата помага да се зголеми возбудата, влажноста на вагината, и сексуалното задоволство. Ова се потврдува кај терапија со и без електростимулација.
Како заклучок
Здравата сексуалност е уникатно индивидуално искуство со позитивни здравствени придобивки за телото и умот. Искуството може да еволуира и да се промени во текот на различните фази од животот, вклучувајќи ја и промената на здравствената состојба.
Отворениот разговор со медицинско лице може да обезбеди начини за одржување и негување на овој важен аспект од животот.
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.