Причини за мултипла склероза
Мултиплата склероза (МС) е откриена пред еден и пол век и, иако е направен голем напредок во многуте истражувања, вистинскиот причинител на оваа болест сè уште не е познат. Луѓето со оваа болест вообичаено се дијагностицирани во доцните дваесетти и средните триесетти години. МС вообичаено се поврзува со посебните климатски области и ретка е во тропските земји.
- Учество на факторот околина – се наведува „епидемија на МС“ на Фарските Острови. Луѓето што мигрираат од областите со висок ризик во области со низок ризик го задржуваат ризикот од земјата на потекло. Најчеста возраст на изложеност е 14 години со латенца од 21 година. Болеста почесто се јавува во повисоката социоекономска група.
- Вирусните инфекции играат улога во настанувањето на болеста, но нивната улога е нејасна. Докажано е дека инфекција со вирусот Epstein-Barr во текот на детството (исто така познат и како хуман херпес вирус 4) претставува потенцијален ризик-фактор за развој на МС, исто како и инфекција со хуман херпес вирус 6.
- Многубројни докази зборуваат во прилог на имунолошко посредувани болести.
- Стресот на работа, во семејството, финансиски или емотивни проблеми, смрт на некој близок се поврзуваат со двојно поголем ризик од влошување на постојните или појава на нови симптоми на болеста.
- Траумата во стручната литература се наведува како една од можните причини за настанување на мултиплата склероза. Иако се спроведени многу истражувања во обидите да се испита оваа теорија, едно е сигурно ‒ многу пациенти споменуваат среднотешки трауми (посебно на главата, вратот или на грбот) како точка од која почнува симптоматологијата на мултиплата склероза.
- Ниското ниво на витамин Д се смета за уште еден причинител за настанување на мултиплата склероза. Познато е дека витаминот Д ги ублажува воспалителните реакции во организмот, го регулира метаболизмот и го одржува имунитетот на добро ниво. До врската помеѓу недостатокот на витамин Д и мултипла склерозата е дојдено преку статистиката на заболените од оваа болест што потекнуваат од постудените краеви со помал број сончеви денови. Студиите покажуваат дека личностите што во детството биле повеќе изложени на сончева светлина имаат помал ризик да заболат од мултипла склероза.
Дополнително: Епидемиологија на МС