Може ли ниските дози на налтрексон (naltrexone) да помогнат во справувањето со МС?

МС Македонија
јануари 14, 2022

Што е налтрексон?

Налтрексон е лек кој помага во справување со зависноста од алкохол и опијати преку спречување на „возвишеното чувство (high)“ предизвикано од овие супстанции. Но, лекарите користат  ниски дози налтрексон (LDN) и за третман на различни состојби вклучително и мултиплa склероза (МС).

Употребата на LDN во третманот на МС е она што е познато како употреба надвор од препораката. Ова се однесува на користење на лек кој се употребува за третирање на состојби различни од она за што е наменет и одобрен за употреба. Тоа исто така значи дека лекот не поминал низ ригорозни тестирања за да се потврди неговата ефикасност и безбедност за лекување на овие други состојби.

LDN се зема во дози кои се околу една десетина од вообичаената доза, обично помалку од 5 милиграми (mg) дневно. Тој ослободува хормони наречени ендорфини во подолг временски период. Ендорфините помагаат да се намали воспалението што е основната причина за многу симптоми на МС.

Како делува

Истражувањата околу употребата на LDN за МС се ограничени. Сепак постојат некои докази кои се темелат на сведоштва на лица кои живеат со МС. Многумина сведочат дека употребата на LND била корисна во намалување на акутните напади (релапси). Други забележале дека ја забавува прогресијата на состојбата со помалку несакани ефекти од традиционалните лекови за МС.

Досегашните студии покажуваат различни резултати. На пример, една студија од 2014 година се занимава со жена која пријавила подобрување на нејзиниот замор поврзан со МС откако почнала да зема 3 mg LDN дневно. Но, таа развила и тромбоцитопенија, состојба предизвикана од низок број на тромбоцити. Авторите на студијата веруваат дека ова е поврзано со LDN.

Во една студија спроведена во 2010 година во која биле вклучени 80 лица со МС, третманост со LDN бил поврзан со значителни подобрувања во менталното здравје што влијаело на квалитетот на животот на учесниците. Но, во справувањето со физичките симптоми на МС се чинело дека не е делотворен.

Една понова студија објавена во 2017 година ги разгледува податоците за издадени лекарски рецепти од 2009 до 2015 година за да се утврди дали на лицата со МС им биле потребни помалку лекови по употребата на LDN. Авторите на студијата не нашле големи разлики во бројот на издадени лекови на оние кои примале LND, во споредба со оние кои не примале LND. Ова ги потврдува резултатите од студијата од 2016 година која се осврна на лабораториските и клиничките податоци за лицата со МС во одреден медицински центар во текот на 10 години.

Многу малку студии за придобивките од LDN за лицата со МС вклучуваат вистински учесници. Наместо тоа повеќето се потпираат на поединечни случаи или податоци од медицински установи. Иако сите тие сугерираат дека LDN не ги влошува симптомите на МС потребни се повеќе долгорочни студии кои вклучуваат голем број учесници за целосно да се разберат придобивките од употребата на LND.

Колку време е потребно за да почне да делува?

Не е сосема јасно колку време е потребно за LND да почне да делува врз симптомите на МС. Ова делумно се должи на недостатокот на истражување и тестирање на ваквата употреба на лекот која е надвор од препораките. Врз основа на постоечките студии LND би требало да почне да делува во рок од три месеци од почетокот на употребата.

Исто така се чини дека LDN е безбеден за долгорочна употреба. Во една студија од 2016 година испитаниците го земале во просек од три до четири години.

Која е препорачаната доза?

Не постои стандардна доза за користење на LDN за справување со симптомите на МС. Но, луѓето обично земаат 3 до 5 mg на ден. Оваа доза можете да ја земате во секое време од денот, а најдобро е лекот да го испиете со полна чаша вода.

Кои се несаканите ефекти?

Целосна доза налтрексон може да ги предизвика следните несакани ефекти:

  • гадење и повраќање
  • болка во стомакот
  • тврда столица
  • намален апетит
  • главоболка
  • замор
  • несоница
  • вртоглавица
  • депресија
  • анксиозност

Исто така постои и предупредување за токсичност и штетност за црниот дроб и може да доведе до негово трајно оштетување. Ова е сериозно предупредување кое го дава „Food and Drug Administration (FDA)“ со цел да ги информира луѓето за опасните несакани ефекти. Овој ризик може да биде помал кога се зема помала доза за третман на МС.

LDN, исто така, може да го зголеми ризикот од тромбоцитопенија, затоа веднаш обратете се кај вашиот лекар ако забележите зголемени модринки или неконтролирано крварење.

Не треба да примате LDN ако:

  • во терапијата примате опијати
  • ако сте во опијатска програма за одвикнување
  • ако сте во акутна апстиненција од опијати
  • ако имате проблеми со црниот дроб

Никогаш не обидувајте се сами да ги поделите таблетите налтрексон за да создадете LDN. Вашиот лекар може да ви помогне и да ве упати во аптека која подготвува LDN.

Запомнете, употребата на LDN во справување со симптомите на МС е надвор од препораките за употреба на лекот. Многу е важно да разговарате со вашиот лекар пред да го употребите. Лекарот мора да биде сигурен дека нема да има интеракција со други лекови кои ги примате за МС.

Заклучок

LDN претставува ветувачки потенцијален третман за справување со  симптомите на МС со релативно малку несакани ефекти во споредба со другите третмани. Сепак, експертите сè уште се обидуваат да откријат како точно делува врз симптомите на МС. Ако сте заинтересирани да го пробате разговарајте со вашиот лекар за да бидете сигурни дека тоа е безбедна опција. Тој исто така може да ви помогне и да ве упати во аптека кoја  подготвува LDN.

 

Извор:  https://www.healthline.com/health/naltrexone-for-MS

Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.