Како мултипла склероза може да влијае на говорот

Многу од лицата кои живеат со МС се справуваат со тешкотии во говорот

Тешкотиите во говорот може да се појавуваат редовно, или пак само неколку минути дневно. Може да забележите дека вашиот говор е нејасен, гласот не е толку силен или имате тешкотии со зборувањето затоа што чувствувате слабост во градите.

Вообичаено е шемата во говорот да се менува, феномен наречен „scanning speech“ каде што долгите паузи создаваат нов ритам додека зборувате. Некои лица, исто така, може да ги забораваат зборовите или да имаат проблем при следењето на разговорот.

Покрај тешкотиите со говорот некои лица се соочуваат и со тешкотии при голтањето. При овие активности се користат многу исти делови од телото.

Тешкотиите со говорот може да се појават во која било фаза на МС, но не секој ги доживува. Постојат неколку техники со чија помош може да се обидете да управувате со овој аспект на состојбата, вклучувајќи терапија, технологија и техники на однесување (бихејвиорални техники).

Причинители

МС е состојба при која имунолошкиот систем го напаѓа заштитниот слој околу нервните клетки. Оштетувањето на нервите може да резултира со губење на координацијата помеѓу мускулите неопходни за говор. Може да влијае и на деловите од мозокот задолжени за јазикот.

Лекарите ги делат тешкотиите во говорот на два вида: афазија и дизартрија.

• Афазија се јавува кога нешто ја попречува способноста на мозокот да го процесира јазикот. Може да заборавите збор или да ви преставува тешкотија да се изразите преку пишан збор.
• Дизартријата е поврзана со губење на моторната функција или мускулната контрола. Ова го отежнува формирањето зборови. Дизартријата е почеста кај лицата кои живеат со МС.

Покрај тоа МС може да предизвика чувство на слабост или замор. Заморот може да придонесе за тешкотии со говорот и голтањето. Меѓутоа проблемите со голтањето може да се појават и поради сушење на устата, несакан ефект предизвикан од некои лекови за МС.

Тешкотиите со говорот се доста чести кај лицата кои живеат со МС. Тие можат да се појават во која било фаза и може да се движат од благи до многу сериозни.

Спречување на тешкотиите со говорот

Тешкотиите со говорот обично се јавуваат како резултат на други симптоми предизвикани од МС како што се оштетување на нервите, замор и мускулна слабост.

Управувањето со МС и соработката со вашиот лекар во изготвувањето на план за третман може да ја забави прогресијата на состојбата. Ова за возврат може да го намали потенцијалот за создавање тешкотии во говорот.

Сепак, ако доживувате тешкотии со говорот предизвикани од МС постојат многу опции за подобрување на состојбата.

Совети за подобрување на говорот

Без разлика на состојбата, постојат начини на кои можете да го подобрите говорот. Станува збор за терапевтски протоколи, па се до употреба на модерна технологија.

Зборувајте бавно

Во ред е да одвоите доволно време. Замолете ги соговорниците да бидат трпеливи за да можете да зборувате бавно онолку колку е потребно.

Бидете смирени кога се чувствувате уморно

Заморот го отежнува говорот. Ако се чувствувате уморни во ред е да изберете да зборувате помалку.

Разговарајте преку говорот на телото

Луѓето не комуницираат само преку говорот. Може да користите гестикулации, контакт со очи и изрази на лицето,  можете и да посочите на предметите наместо да ги изговарате. Овие опции го намалуваат стресот ако не се чувствувате спремни за разговор.

Комуницирајте со пишување

Паметните телефони и другите уреди можат да бидат корисни. Можете да испраќате пораки, е-пошта или да пишувате фрази. Ова може да ви помогне да имате подолги разговори.

Работете со терапевт

Јазично – говорниот патолог е специјално обучен за помош на лицата со говорни предизвици. Тој може да препорача третман, како што се физички вежби кои помагаат во подобрувањето на јасноста на зборовите и јачината на гласот.

Користете помошни уреди

Лицата кои се соочуваат со потешки говорни предизвици можат да користат засилувачи на говорот и „текст во говор“ уреди. Со помош на овие уреди тивкиот говор може да стане погласен, или  можеме да ги користиме да зборуваат наместо нас.

Испланирајте

Понекогаш, пред важни разговори, може да помогне да запишете што планирате да кажете. На пример, сосема е во ред да користите белешки при посета на вашиот лекар.

Прашајте ги соговорниците

Комуникацијата е двостран процес. Добро е да побарате потврда од личноста со која разговарате дека разбира што зборувате. Повеќето луѓе со задоволство ќе го повторат она што сте го кажале.

Симптоми на грлото

Покрај тешкотиите со мускулната координација и слабоста што некои лица ги доживуваат, МС може да предизвика и вкочанетост во устата и грлото.

Вкочанетоста во грлото може да го отежне голтањето. Може да влијае и на говорот. Според „ MS Trust во UK“ истите тешкотии кои влијаат на голтањето, исто така, влијаат на говорот. Некои лица се соочуваат со тешкотии во исхраната, како што се проблеми со џвакањето, чувството дека храната им е заглавена во грлото или лигавење.

Заклучок

Многу од лицата кои живеат со МС доживуваат одредени промени во нивниот говор. Постојат бројни начини со чија помош можете да ја подобрите способноста за комуникација, од специфични вежби до модерна технологија.

Преку соработка со вашиот лекар можете да добиете пристап до ресурси ,како што се логопеди, кои можат да понудат дополнително образование и поддршка.

 

Извор: https://www.healthline.com/health/multiple-sclerosis/how-ms-affects-speech#the-takeaway

Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.