Зошто мултиплата склероза боли?
Какви видови на болка може да предизвика мултипла склероза?
Иако до средината на 1980-тите се сметаше за болест која не предизвикува никаква болка, сепак се докажа дека мултипла склероза (МС) може да боли. Болката е чест симптом дури кај две третини од лицата со МС и влијае на секојдневните активности во текот на работното време, семејните обврски, рекреацијата, дружењето.
Зошто се јавува болка?
Долготрајната болка може да настане како резултат на заморување и истегнување на мускулите кои се користат за компензирање на работата на мускулите кои се ослабнати поради МС. Меѓутоа, лицата со МС можат да почувствуваат и остра болка која се јавува како резултат на лезии на мозокот и ‘рбетниот мозок.
Специјалистите болката предизвикана од МС обично ја делат на невропатска, пароксизмална и мускулно-скелетна или секундарна болка.
Невропатска болка
Невропатската болка е најчест тип на болка кај лицата со МС и е предизвикана од демиелинизација, односно губење на заштитниот слој кој ги обвиткува нервните влакна. Во човечкото тело постојат нервни завршетоци наречени ноцицептори кои откриваат сигнали за болка. Кога ќе дојде до демиелинизација нервните сигнали кои патуваат низ нервните клетки се губат и допираат до блиските ноцицептори кои погрешно ги препознаваат како сигнали за болка.
Алодинија се јавува кога некое лице чувствува болка поради ефектот на стимул кој инаку не предизвикува болка, како што е допирање на друго лице или облекување облека. Овој тип на болка зависи од времетраењето на стимулот, што значи дека трае исто колку и стимулот (кога човекот ќе соблече парче облека чувството на болка исчезнува). Затоа алодинијата обично трае многу кратко.
Тригеминалната невралгија е можеби најсилниот симптом на МС кој предизвикува болка. Се карактеризира со силна, остра болка во долниот дел на лицето (често предизвикана од џвакање, четкање заби или консумирање течности). Овој тип на болка е краткотраен (обично трае неколку секунди, а најмногу 2 минути), но може да доведе до хронична болка на лицето.
МС прегратка։ Како и другите симптоми, МС прегратката ја доживува секој различно. На пример, некои луѓе ја опишуваат како остра болка, додека други повеќе како досадна и невропатска болка, како чувство на пецкање или тремор. Сепак, има и лица кај кои МС прегратката се рефлектира како чувство на силна болка која ги спречува во секојдневните активности. МС прегратката може да се почувствува насекаде во торзото, од половината до рамената и може да биде локализирана (на одреден, помал дел од телото) или да го зафати целото тело. Исто така, болката може да биде минлива или постојана.
Парестезија: Оваа болка се манифестира како вкочанетост, трнење, чешање, пецкање, зуење или вибрации. Иако лицата со МС често ја опишуваат како исклучително досадна и непријатна болка, понекогаш таа може да биде многу силна.
Главоболки: Лицата со МС често патат од главоболки и мигрена.
Оптички невритис: Повеќето лица со МС го опишуваат оптичкиот невритис, или воспаление на оптичкиот нерв, како болка при движење на очите. Оваа болка обично поминува по неколку дена, дури и кога видот е зачуван.
Мускулно-скелетна или секундарна болка
Овој тип на болка се нарекува и ноцицептивна болка и обично се јавува како резултат на симптоми на МС како што се спастичност, слабост, неподвижност или отежнато одење. Овие типови на болка припаѓаат на мускулно-скелетните:
Болка во зглобовите: Дел од лицата со МС чувствуваат болка во колковите и колената предизвикана од тешкотии со рамнотежата и одењето.
Вкочанетост: Лицата со МС може да почувствуваат вкочанетост во нозете, рацете и колковите поради намалена подвижност.
Болка во грбот: Овој тип на болка може да се појави поради неправилно одење, неподвижност, МС прегратки, продолжено седење во инвалидска количка или постојано прилагодување на движењето или положбата поради симптоми на МС.
Болка предизвикана од грчеви: Флексорните грчеви (мускул задолжен за виткање на екстремитетите) предизвикуваат контракција и виткање на рацете и нозете кон телото. Ова предизвикува чувство на постојани грчеви или непријатна болка во екстремитетите.
Пароксизмална болка
Ова е акутна (ненадејна) болка која трае само неколку мигови по што престанува. Меѓутоа понекогаш по престанокот се појавува чувство на напријатна болка во погодената област на телото. Во пароксизмалните симптоми се вбројуваат:
Болка предизвикана од грчеви на флексорните мускули
Грчеви во екстензорите (мускули кои се задолжени за истегнување): Кај ваквите грчеви доаѓа до вкочанување на екстремитетите, најчесто на нозете, а лицето не може да го свитка зглобот или коленото. Исто така, може да дојде до грчење на екстремитетите, односно нагло грчење на телото. Грчевите во екстензорните мускули обично не се болни, но можат да бидат многу силни и да предизвикаат пад од стол, кревет или инвалидска количка.
Лермитовиот синдром: Ова е чувство кое се јавува при движење на главата, слично на електричен удар, кој се спушта по ‘рбетот.
Извор: https://neuronet.rs/ms/ms-novosti/zasto-ms-boli/
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.