Како пристапот насочен кон пациентот може да помогне да се постигне висококвалитетна здравствена заштита?
Постигнувањето висококвалитетна здравствена заштита е амбиција на владите и здравствените организации ширум светот. Постојат многу различни мислења за тоа што значи „висок квалитет“, како треба да се мери и како може да се постигне. Како општо правило, „висок квалитет“ се зема како здравствена заштита што ги следи најновите препораки на специјализираните медицински здруженија и експерти. Сепак, повеќето луѓе сега се согласуваат дека висококвалитетната здравствена заштита, исто така, мора да се заснова на потребите, преференциите и вредностите на секој поединечен пациент – со други зборови, пациентот треба да биде во центерот на вниманието. Покрај добивањето на најсоодветниот третман, грижата насочена кон пациентот може да помогне да се постигнат многу други работи кои се сметаат за знаци на висококвалитетна нега, како што се: да се слушне гласот на пациентите, навремен третман и пристап до негата.
Што е „висококвалитетна“ грижа насочена кон пациентот и како ја мериме?
Мерењето на квалитетот на здравствената заштита е важно, бидејќи им овозможува на здравствените работници да разберат што прават добро и што треба да се подобри. Меѓутоа, бидејќи грижата насочена кон пациентот се фокусира на индивидуалните потреби кои варираат од едно до друго лице, не е секогаш јасно што да се мери. Тие вклучуваат: здравствените работници да се обучени за комуникациски вештини; намалување на бројот на различни лекари и медицински сестри вклучени во грижа за пациентот (на пр. престој во болница); и обезбедување на персоналот да се претстави себеси и да му ја објасни својата улога на пациентот пред да започне да дава нега.
ЗДРАВСТВЕНИТЕ ОРГАНИЗАЦИИ СЀ ПОВЕЌЕ ЈА ПРЕПОЗНАВААТ ВРЕДНОСТА НА БАРАЊАТА И ИСКУСТВАТА НА ПАЦИЕНТИТЕ СО ЦЕЛ СЕ РЕДИЗИЈАНИРААТ ПРОЦЕСИТЕ И СИСТЕМИТЕ ТАКА ШТО ЌЕ БИДАТ ФОКУСИРАНИ НА ПОТРЕБИТЕ НА СЕКОЈ ПАЦИЕНТ
Студиите кои го разгледуваат квалитетот на грижата насочена кон пациентот се фокусираат или на личните искуства на пациентот (на пр. дали тие сметаат дека нивните лични приоритети биле земени предвид од страна на здравствените тимови), или на тоа дали нивното здравје се подобрува како резултат на грижата. Видеоснимките покажаа дека сеќавањата на пациентите од дискусијата со нивниот лекар не секогаш одразуваат како всушност се одвивала дискусијата, што го отежнува користењето на анкетите на пациентите за мерење на квалитетот на негата. Затоа, мерењето на подобрувањето на здравјето може да биде најдобриот начин за проценка на вредноста на различните видови грижа насочена кон пациентот. На пример, една петгодишна студија која спореди две болници покажа дека грижата насочена кон пациентот резултира со пократок престој во болница и пониски вкупни трошоци за нега. Во друга студија, грижата насочена кон пациентот беше поврзана со подобро справување со симптомите и помалку медицински тестови.
Како пациентите можат да влијаат со цел обезбедување на висококвалитетна нега?
Пациентите и членовите на нивните семејства често имаат многу вредни сознанија, како за нивната здравствена состојба, така и за начинот на кој им била дадена нега во и надвор од болницата. Овие сознанија значат дека пациентите можат да играат активна и важна улога во мерењето и подобрувањето на квалитетот на здравствената заштита на различни организациски нивоа. Универзитетот во Монтреал во Канада неодамна формираше нов оддел за вклучување на пациентите во дизајнирање подобри здравствени услуги. Одделот вклучува тимови од пациенти и лекари кои помагаат да се дизајнира обука за студенти по медицина, да се истражуваат нови начини за обезбедување грижа насочена кон пациентот и да се процени квалитетот на здравствените услуги во нивната локална област. Пациентите кои учествуваа во овој проект рекоа дека тоа им помогнало да се чувствуваат како да придонесуваат, како и да ги подобрат своите вештини за комуникација и тимска работа.
Пациентите и членовите на нивните семејства, исто така, можат да се потпираат на конкретни искуства за да предложат едноставни, практични идеи за подобрување на начинот на кој се обезбедува здравствена заштита. На пример, ќерката на жена со сериозни проблеми со меморијата предизвикани од деменција предложи да се користи дневник за да се запише кога нејзината мајка била бањата, хранета и ѝ давала лекови за да се подобри комуникацијата помеѓу членовите на семејството и здравствени работници. Во друг случај, пациент со рак забележал дека лекарите и медицинските сестри не секогаш се претставувале лично. Таа формираше национална кампања наречена „Здраво, се викам…“, која ги охрабри лекарите и медицинските сестри да комуницираат на „похуман“ начин и помалку како анонимни професионалци.
Во изминатите неколку децении, разбирањето за висококвалитетната здравствена заштита се промени, станувајќи поширока дефиниција за грижата што го опфаќа она што се случува дома и во локалната заедница. Здравствените организации сè повеќе ја препознаваат вредноста на увидите и искуствата на пациентите за да им помогнат да ги ре-дизајнираат процесите и системите на начин што ќе бидат повеќе фокусирани на пациентот.
Забелешка: Овој текст има информативен карактер и не оезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.