Објаснување на појавата на чувство на гадење ако живеете со мултипла склероза
Поврзаноста помеѓу МС и чувството на гадење
Симптомите на мултипла склероза (МС) се предизвикани од лезии во централниот нервен систем. Локацијата на лезиите ги одредува специфичните симптоми кои може да се појават. Чувството на гадење е само еден од широкиот спектар на потенцијални симптоми на МС, но не е меѓу најчестите.
Гадењето може да биде директен симптом на МС или дел од друг симптом. Исто така, некои од лековите кои се користат за третирање на специфични симптоми на МС може да предизвикаат гадење. Да разгледаме подетално.
Вртоглавица и зашеметеност
Вртоглавица и зашеметеност се вообичаени симптоми на МС. Иако обично се минливи, тие може да предизвикаат гадење.
Вртоглавицата не е исто што и зашеметеност. Тоа е лажно чувство дека вашето опкружување забрзано се движи или се врти како возење на вртелешка во забавниот парк. И покрај тоа што знаете дека собата не се врти навистина, вртоглавицата може да биде прилично вознемирувачка и да создаде непријатно чувство.
Епизодата на вртоглавица може да трае неколку секунди или неколку дена. Може да биде постојана, или да се појавува периодично. Сериозен случај на вртоглавица може да предизвика двојно гледање, гадење или повраќање.
Кога се соочувате со вртоглавица најдете удобно место да седнете и да мирувате. Избегнувајте ненадејни движења и силни светла. Исто така избегнувајте читање. Мачнината веројатно ќе се намали кога ќе престане чувството на вртење. Одредени лекарства за вртоглавица кои се издаваат без рецепт може да помогнат.
Понекогаш, движење во видното поле или дури и перцепцијата на движење е доволно за да предизвика гадење и повраќање кај лицата со МС. Разговарајте со вашиот лекар ако почувствувате продолжени напади на гадење.
Несакани ефекти предизвикани од лекарства
Некои лекови кои се користат за третман на МС и нејзините придружни симптоми може да предизвикаат гадење.
„Ocrelizumab (Ocrevus)“ се внесува преку инфузија и се користи во третманот на релапсно – ремитирачка и примарно – прогресивна МС. Несаканите ефекти вклучуваат гадење, треска и иритација на местото на инјектирање. Лековите за третман на МС кои се внесуваат орално, како што се „teriflunomide (Aubagio) и dimethyl fumarate (Tecfidera)“ исто така може да предизвикаат гадење.
„Dalfampridine (Ampyra)“ е лек кој се внесува орално и се користи за подобрување на способноста за одење кај лицата со МС. Еден од потенцијалните несакани ефекти на овој лек е гадење.
Мускулниот релаксант наречен „dantrolene“ може да се користи за третман на спастичност и мускулни грчеви предизвикани од различни состојби, вклучително и МС. Појавата на гадење и повраќање по земањето на овој лек кој се внесува орално може да укажува на сериозни несакани ефекти, вклучително и оштетување на црниот дроб.
Еден од најчестите симптоми на МС е замор. За да им се помогне на лицата со МС да го надминат заморот се користат различни лекарства, а дел од нив може да предизвикаат гадење. Меѓу нив се вбројуваат։
- modafinil (Provigil)
- amantadine
- fluoxetine (Prozac)
Депресијата е уште еден симптом на МС, а третманот со лекови како што се „sertraline (Zoloft) и paroxetine (Paxil)“ може да предизвика гадење.
Третман на симптомите на гадење
Ако вртоглавицата и гадењето станат постојан проблем консултирајте се со вашиот лекар. Некои лекови кои се издаваат на рецепт може да помогнат во справувањето со вртоглавица. Во екстремни случаи вртоглавицата може да се третира со кортикостероиди.
Исто така, ако почувствувате несакани ефекти од лекарствата кои ги примате (како вртоглавица) известете го вашиот лекар. Можеби сѐ што е потребно е промена на терапијата.
Заклучок
Ако ви се појавува чувство на гадење, а живеете со МС, не сте единствени. Многу луѓе го доживуваат како последица од вртоглавица и зашеметеност, или поради несакани дејствија на некој лек. Без разлика од што е предизвикано чувството на гадење, известете го вашиот лекар. Можеби сѐ што треба за да го ставите под контрола непријатното чувство на гадење е дополнување или адаптирање на вашиот план за лекување.
Извор: https://www.healthline.com/health/multiple-sclerosis-nausea
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.