Мултипла склероза и тешкотии со дебелото црево
Ако имате МС веројатно дека ќе морате да ги промените вашите навики во тоалетот. Можеби се справувате со брзи, умерени или премногу бавни движења на дебелото црево. Разговарајте за овие тешкотии со вашиот лекар. Тој може да препорача начини како повторно да дојдете до редовна столица. Постојат и едноставни начини да ги прилагодите вашите навики со што посетата на тоалетот би ја направиле попредвидлива.
Тешкотии со дебелото црево со кои може да се соочите ако имате МС
Констипација (запек). Ова е многу вообичаено кај лицата со МС. Болеста може да ги прекине пораките што нервите ги испраќаат до и од мозокот, кои сигнализираат дека е време за празнење на дебелото црево. МС исто така може да ги спречи карличните мускули да се опуштат и на тој начин да му помогнат на телото да се ослободи од изметот. Исто така може да го спречи природното зголемување на активноста на дебелото црево после оброк. Независно од МС, лошата исхрана (вклучително и недоволното внесување растителни влакна), премалку вежбање и депресијата влијаат на дигестивниот систем. Лекарства и додатоци на исхраната исто така можат да предизвикаат констипација.
Губење на контрола на дебелото црево. Овој проблем значи дека можеби нема да можете да стигнете доволно брзо до тоалетот. Најчестите причини вклучуваат долготраен запек, тешка дијареа, стрес, хемороиди, оштетување на нервите или мускулите и премногу употреба на лаксативи.
Дијареа. Обично се случува поради алергии или чувствителност на зачинета храна или млечни производи, неисправна вода или храна, промена на нивото на активност или инфекција. Дијареата, исто така, може да сигнализира друг проблем. Ако се појавува често или постојано посетете го вашиот лекар. Во некои случаи тој може да ви препорача посета на специјалист за болести на дебелото црево, наречен гастроентеролог.
Како да ги вратите движењата на дебелото црево во нормала
Пијте повеќе течности. Секојдневно внесувајте доволно течности. Можеби ќе ви се појави дилема доколку МС дополнително ви предизвикува тешкотии со мочниот меур. Но, тоа ќе ја влоши состојбата со запекот. За да го раздвижите дебелото црево наутро направете си топол напиток, како што е топла вода или јаболков напиток, или пијте половина до една чаша сок од сливи.
Внесувајте повеќе растителни влакна. Најдобар начин е да јадете што повеќе свежо овошје и зеленчук, и житарки. Додадете 2 до 4 лажици непреработени трици во топлиот или ладен оброк од житарки, или изматете ги со јаболко, тесто за палачинки, пудинг, тесто за мафини, млечен напиток или тесто за колачиња. Внесувајте многу течности што ќе им овозможи на триците да делуваат во организмот. Вашиот лекар може да препорача да внесувате и додатоци во исхраната.
Држете се до распоредот. Одредете време кога ќе одите во тоалет. Обидете се тоа да биде веднаш по оброците, бидејќи јадењето е природен начин да го поттикнете празнењето. Обидете се да не поминат повеќе од 2 до 3 дена помеѓу празнењето на дебелото црево.
Вежбање. Ова е одличен начин да го активирате дигестивниот тракт.
Користете омекнувачи на столицата, но само ако тоа ви го препорача лекар.
Како да се контролира дијареата?
- Пијте повеќе течности за да го надоместите она што вашето тело го губи. Обидете се да внесувате вода, пијалаци со вкус на лимон, сок од овошје или зеленчук, млеко или супа.
- Разговарајте со вашиот лекар или нутриционист колку растителни влакна треба да внесувате во исхраната.
- Внесувајте мека и течна храна како што е шербет, јогурт, пудинг.
- Консултирајте се со вашиот лекар дали промена во лекарствата кои ги примате може да помогне во справувањето со дијареа. Немојте да ја прекинувате или намалувате терапијата без консултација со лекар.
- Немојте да внесувате лекарства за дијареа без да се консултирате со вашиот лекар.
Извор: https://www.webmd.com/multiple-sclerosis/bowel-problem-linked
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.