Според германско истражување МС не го зголемува ризикот од сериозно заболување со COVID – 19
Според резултатите од истражување спроведено на повеќе од 150.000 хоспитализирани лица во Германија, лицата со мултипла склероза (МС) не се изложени на поголем ризик од сериозни последици предизвикани од COVID – 19.
Студијата „Мултипла склероза не е поврзана со зголемен ризик за тешка клиничка слика при заболување од COVID – 19 – национална ретроспективна пресечна студија од Германија“ е објавена во „Neurological Research and Practice“.
Од раните фази на пандемијата научниците се обидуваа да одредат кои групи граѓани може да бидат во поголем ризик од тежок тек на болеста. Иако се чини дека МС не ги зголемува шансите за развој на тешка клиничка слика предизвикана од COVID – 19, некои фактори како што е употребата на имуносупресивни лекови може да придонесат за полоши резултати.
За да го испитаат влијанието на МС врз текот на болеста предизвикана од COVID – 19, научниците во Германија ги испитуваа медицинските досиеја на сите пациенти во земјата кои имле потреба од хоспитализација за COVID-19 во 2020 година.
Од вкупно 157.524 пациенти кои биле хоспитализирани заради COVID – 19, 551 (0,3%) имале дијагноза МС. Меѓу нив 106 имале релапсно – ремитентна форма на МС, 99 имале секундарно – прогресивна МС, 76 имале примарно – прогресивна МС и 270 имале неодредена форма на МС.
Во споредба со останатите, пациентите со МС биле генерално помлади (60,6 наспроти 66,9 години) и во поголем процент жени (62,8% наспроти 48,2%).
Кога научниците ги споредиле резултатите помеѓу двете групи откриле дека лицата со МС имаат помали стапки на прием на одделенијата за интензивна нега (17,1% наспроти 22,7%), помала употреба на вентилација (9,8% наспроти 14,5%) и помала смртност во болнички услови (11,1% наспроти 19,3%) во споредба со лицата кои немале МС.
Меѓутоа бидејќи возраста, полот и формата на МС може да влијаат на резултатите, научниците спровеле дополнителни анализи за да ги објаснат овие фактори.
Научниците откриле дека резултатите не зависат од полот и формата на МС туку од возраста, што значи дека пациентите со МС имале подобри резултати без оглед на нивниот пол или форма на болеста. Кога при анализите била земена предвид возраста, смртноста на пациентите во болнички услови била слична кај сите пациенти без разлика дали имаат МС.
Научниците забележале дека недостатокот на информации за степенот на попреченост кај пациентите со МС, како и за неодамнешната употреба на имуносупресивни лекови претставува ограничување на студијата, бидејќи и двете се поврзани со полоша клиничка слика предизвикана од COVID-19.
Како и да е „самото тоа што имате МС не ја зголемува веројатноста за тежок тек на COVID-19, во споредба со пациентите кои немаат МС“, заклучија научниците.
„Сознанијата за факторите на ризик поврзани со МС се од витално значење за идентификување на пациентите со поголем ризик од тежок тек на COVID-19“, додаваат тие. „Идните студии, исто така треба да ја доведат во прашање појавата и влијанието на синдромот на „долготраен COVID“ кај пациентите со коморбидна МС.
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.