Жива библиотека

Како е да се живее со мултипла склероза? На оваа тема имаа можност да се запознаат студентите по општа медицина од Европската медицинска студентска асоцијација (ЕМСА), Македонија.

На ден 03.04.2024 година, на покана ЕМСА, членови на Националното здружение за МС зедоа активно учество во работилница во рамки на проектот „Жива библиотека“. Настанот беше посветен на тема мултипла склероза, а присутните студенти имаа можност преку дискусија, прашања и споделување на животните приказни на членовите на здружението, подетално да се запознаат со нивната здравствена состојба и секојдневните тешкоти.

Оваа хронична состојба предизвика посебно внимание кај студентите, покажаа спремност за совладување нови знаења, а исклучителен интерес покажаа при учеството во практичниот дел од работилницата, каде на импровизиран начин можеа да ги почувствуваат предизвиците да се живее со МС.

Изразуваме огромна благодарност на ЕМСА кои работат во полза на развојот и доградувањето на знаењата на студентите преку низа на проекти и активности вон регуларните часови.

Ова е почеток на една плодна и успешна соработка која имаме во план да прерасне во градење на взаемно партнерство за реализација на активности и проекти во интерес на МС заедницата во Македонија.

За Националното здружение за МС

Национално здружение за помош и поддршка на лица со мултипла склероза – Здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 11. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти  (анг. World Patient Alliance), асоцијативна членка на Интернационалната федерација за МС (анг. MS International Federation) и членка на Националната Алијанса на пациентски организации (НАПО).

Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.

Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.

За да дознаете повеќе за здружението посетете ја нашата веб страница.