Дали мултипла склероза е автоимуно заболување?
Мултипла склероза (МС) е хронична состојба која влијае на централниот нервен систем. МС се смета за имуно-посредничка болест која предизвикува имунолошкиот систем на телото да дејствува невообичаено.
Иако МС е класифицирана како имуно-посредничка болест тоа автоматски не значи дека е автоимуно заболување. Всушност резултатите од истражувањата на оваа тема се релативно двосмислени, при што некои експерти тврдат дека МС не одговара на стандардните упатства за класично автоимуно заболување.
Според една статија објавена во „Autoimmune Diseases“ примарниот критериум за една состојба да се смета за автоимуна болест е присуството на специфичен автоантиген. Автоантигенот е супстанца во телото која имунолошкиот систем погрешно ја смета за туѓа супстанција предизвикувајќи таа да го „нападне“ антигенот.
До денес не постои единствен автоантиген кој е идентификуван кај МС. Дополнително, повеќе студии спроведени врз животни покажаа спротивставени резултати поврзани со антигените, имунолошките клетки и други фактори, што ја доведува во прашање класификацијата на МС.
Сепак, и покрај двосмислените истражувања на оваа тема, многу научници, лекари и други медицински специјалисти ја класифицираат МС како автоимуна состојба.
Што не ни е познато сѐ уште?
Иако истражувањата за МС се драматично подобрени во текот на изминатите неколку децении, сè уште има многу многу работи кои не ни се познати.
На пример, развојот на МС е комплициран, а научниците сè уште не се сосема сигурни што ја предизвикува болеста.
Сепак сегашниот консензус во научната заедница укажува на фактори поврзани со генетиката, имунолошкиот систем и опкружувањето.
Покрај тоа МС е високо индивидуализирана болест, што значи дека третманот и управувањето со состојбата можат да варираат индивидуално. На пример, постојат различни потенцијални предизвикувачи кои можат да доведат до релапс, но овие предизвикувачи често изгледаат различно во зависност од случајот.
Сѐ уште има многу да се истражува во врска со сложеноста на МС, но научниците секојдневно напредуваат и стекнуваат нови сознанија.
Како МС влијае на телото?
Кај лицата со МС имунолошкиот систем погрешно го напаѓа централниот нервен систем, ефикасно оштетувајќи го:
- миелинската обвивка која ги штити нервните влакна на централниот нервен систем (мозокот, ‘рбетот и оптичките нерви)
- нервните влакна
- клетките кои произведуваат миелин
Оштетувањето на нервите, миелинот и клетките кои произведуваат миелин им отежнува на нервите на централниот нервен систем да испраќаат и примаат пораки. За возврат, ова доведува до намалено функционирање во рамките на централниот нервен систем, предизвикувајќи широк спектар на невролошки симптоми.
Постојат одредени чести симптоми на МС, но симптомите кои ги доживува секој поединец може да варираат во зависност од фазата на болеста, прогресијата на болеста и многу повеќе. Ова може да вклучува:
- нарушена функција на мочниот меур
- тешкотии со цревата
- когнитивни нарушувања
- депресија
- намалено чувство за вкус
- вртоглавица
- дизестезија
- дисфагија
- емоционални нарушувања
- замор
- губење на слух
- јадеж
- мускулна спастичност
- вкочанетост
- болка
- респираторни проблеми
- напади
- сексуална дисфункција
- тешкотии со говорот
- пецкање
- тремор
- тешкотии со одењето
- вртоглавица
- тешкотии со видот
- слабост
Според „The National Multiple Sclerosis Society“, симптомите на МС може да варираат и да се менуваат со текот на времето, и не постојат две лица кои доживуваат идентична комбинација на симптоми во исто време.
Четири типа на МС
Постојат четири главни типови на МС. Секој тип се одредува според разликите во релапсите, ремисиите и сериозноста на симптомите:
- Клинички изолираниот синдром „ Clinically isolated syndrome (CIS)“ е почетна фаза на МС во која раното оштетување на нервите предизвикува невролошки симптоми.
- Релапсно-ремитирачката МС „ Relapsing-remitting MS (RRMS)“ се дефинира со повторување на периодите на релапси при што симптомите на МС се најсилни, и ремисии при што симптомите на МС се подобруваат.
- Секундарно-прогресивната МС „ Secondary-progressive MS (SPMS)“ се карактеризира со повторување на периоди на релапси проследени со делумна ремисија, а потоа како што болеста напредува имаме постојано влошување на симптомите.
- Примарно-прогресивна МС „ Primary-progressive MS (PPMS)“ состојбата полека и прогресивно се влошува, без вистински закрепнувања или ремисии помеѓу релапсите.
Заклучок
МС е имуно-посредничка болест која се карактеризира со оштетување на нервите во централниот нервен систем. Иако многу здравствени работници ја дефинираат како автоимуна болест, истражувањата сугерираат дека МС не одговара целосно на сегашните критериуми за автоимуно заболување.
Извор: https://www.healthline.com/health/ms/is-ms-an-autoimmune-disease
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.