МИТ 6. Лицата со мултипла склероза не можат да работат
Факт: Лицата со мултипла склероза (МС) се вредна работна сила. МС обично се дијагностицира помеѓу 20 и 45 години, период во животот кога повеќето луѓе работат на градење кариера. Вистина е дека некои лица со МС се соочуваат со предизвици и можеби ќе треба да ја променат својата кариера, но тоа не е потребно кај сите. Се проценува дека 70% од лицата со МС ја напуштаат својата работа во рок од 10 години од нивната дијагноза, според Глобалниот извештај за вработување кај МС за 2016 година на Меѓународната федерација за МС.
Во врска со ова, National Multiple Sclerosis Society известува: „Лицата кои живеат со МС често продолжуваат да работат долго по поставување на нивната дијагноза.“ Тие исто така признаваат, сепак, дека „Некои лица со МС одлучуваат да ги напуштат своите работни места кога првпат ќе бидат дијагностицирани или ќе го доживеат првиот поголем релапс, често на предлог на нивното семејство или лекар.“ National Multiple Sclerosis Society објаснува дека оваа одлука, во некои случаи, може да се донесе пребрзо „и во време кога симптомите можат да влијаат на донесување на одлуките. Лековите кои ја модифицираат болеста, новите технологии, подоброто управување со симптомите, законската заштита на вработувањето и ресурсите на заедницата можат да ви помогнат да останете дел од работната сила.“ Навистина, редовниот работен однос може да им користи на лицата со МС, како што објаснуваат авторите на една студија: „Покрај обезбедувањето финансиска сигурност, вработувањето може значително да придонесе за физичката и менталната благосостојба на лицата со МС, обезбедувајќи извор на поддршка и социјална интеракција, како и чувство на идентитет и цел.“